បាក់ស្រុតស្ពានឆ្លងទន្លេសេកុងដោយសារទឹកហូរច្រោះ

ប្រភព៖http://wmc.org.kh/

ស្ពានឆ្លងទន្លេសេកុងមានប្រវែងជិត៣០០ម៉ែត្រដែលទើបនឹងសាងសងរួចរាល់តែពុំទាន់សម្ភោធដាក់ឱ្យប្រើប្រាស់ រងការបាក់ស្រុតក្បាលស្ពានដោយសារទឹកជំនន់ហូរច្រោះ។ ស្ពានឆ្លង​ទន្លេ​សេកុងនៅត្រង់ចំណុចបង្កោលលេខ ៧៨ ជាប់ព្រំដែនកម្ពុជា-ឡាវ ស្ថិតនៅក្នុងឃុំសន្តិភាព ស្រុក សៀមប៉ាង ខេត្តស្ទឹងត្រែង។

លោក ម៉ែន គង់ អ្នកនំាពាក្យសាលាខេត្តស្ទឹងត្រែងឱ្យដឹងថា ស្ពានឆ្លងទន្លេរសេកុង​ឬហៅ​ស្ពាន​អូរគូក មានប្រវែង២៦០ម៉ែត្រ ត្រូវបានទឹកជំនន់ហូរច្រោះបាក់ក្បាលស្ពានរក​ការខូច​ខាតពុំអាចធ្វើ​ដំណើរ​ឆ្លងកាត់បានទេ ចាប់តំាងពីថ្ងៃទី ១ ខែ កញ្ញា ឆ្នំា ២០១៨។ លោក ម៉ែន គង់ បញ្ជាក់ថា កងកម្លំាងវិស្វកម្មនៃកងកម្លំាងខេមរភូមិន្ទកំពុងសិក្សាអំពីផលប៉ះពាល់ ដើម្បី​ជួសជុល​ឡើង​វិញ។

យោងតាមសេចក្តីជូនដំណឹងរបស់ក្រសួងធនធានទឹកឱ្យដឹងថា ខេត្តស្ទឹងត្រែងស្ថិតក្នុង​ខេត្តមួយ​ចំនួនទៀតនឹង​មានភ្លៀងធ្លាក់ខ្លំាងរហូតដល់ថ្ងៃអាទិត្យសប្តាហ៍នេះ។

លោក ម៉ែន គង់ អ្នកនំាពាក្យសាលាខេត្តស្ទឹងត្រែងអំពាវនាវឱ្យប្រជាពលរដ្ឋសុំឱ្យធ្វើដំណើរ​តាមទូកមួយរយៈ​សិនរហូត​ដល់​ជួសជុល​និ​ងដាក់ឱ្យប្រើប្រាស់ជាផ្លូវការ៕

 រដ្ឋាភិបាល(ក្រសួងមហាផ្ទៃ)គ្រោងនឹងបង្កើតខេត្តចំនួន២ទៀត ដែលត្រូវបានស្នើរដោយក្រសួងមហាផ្ទៃ

ប្រភពព័ត័មាន៖ https://vodhotnews.com/2018/08/31

លោកនាយករដ្ឋមន្ត្រី ហ៊ុន សែន​ បានចុះ​ហត្ថលេខា​យល់ព្រមឲ្យ​មាន​ការ​សិក្សាដើម្បី​​បង្កើតខេត្តថ្មីចំនួនពីរ តាម​សំណើរ​របស់​ក្រសួងមហាផ្ទៃ​ដែល​ចង់​​បំបែក​ឲ្យមាន​ខេត្តថ្មី​ពីភូមិសាស្ត្រខេត្តកណ្តាល និង​ ​ភូមិសាស្ត្រ​ខេត្តមណ្ឌល​គិរី​ និង​រតនគិរី។

ក្នុង​លិខិតរបស់ក្រសួងមហាផ្ទៃដែលវីអូឌីទទួលបាននៅថ្ងៃនេះ បញ្ជាក់ថាសំណើរ​សុំ​បង្កើត​ខេត្តថ្មីនេះ​ ដើម្បី​ជួយលើកម្ពស់​ប្រសិទ្ធិភាពគ្រប់គ្រងរដ្ឋបាលថ្នាក់ក្រោមជាតិ ថែរក្សាសន្តិសុខ សណ្តាប់​ធ្នាប់សាធារណៈ ជំរុញការអភិវឌ្ឍនៅមូលដ្ឋាន និងងាយស្រួលផ្តល់សេវា​សាធារណៈ​ជូន​ប្រជាពលរដ្ឋជាដើម​។

លិខិតរបស់​ក្រសួងមហាផ្ទៃដដែល ស្នើទៅរដ្ឋាភិបាលរៀប​ចំបង្កើតខេត្តថ្មីឲ្យ​ចប់សព្វគ្រប់ នៅខែមករា ឆ្នាំ២០១៩ ដើម្បីទុកពេលវេលាសមស្របងាយស្រួលឲ្យ​​រដ្ឋាភិបាលកំណត់​ចំនួនអាសនៈក្រុម​ប្រឹក្សា​រាជ​ធានី​​ ខេត្ត ក្រុង ស្រុក ខណ្ឌ សម្រាប់​ការបោះ​ឆ្នោត​ជ្រើសរើស​ក្រុម​ប្រឹក្សា​រាជធានី ខេត្តក្រុង ស្រុក ខណ្ឌ អាណត្តិទី៣ ដែលតាមអាណត្តិកំណត់ក្នុងច្បាប់ គឺអំឡុងខែឧសភា ឆ្នាំ២០១៩​ខាង​មុខ​នេះ។

នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ដំណាក់​​កាលនេះ រដ្ឋាភិបាលត្រូវទំលាក់ថវិកាជាតិឲ្យបានច្រើនដល់ស្រុក ឃុំ សង្កាត់ ជា​ជាង​បង្កើត​ខេត្តថ្មីបន្ថែមទៀត ធ្វើឲ្យខ្ចះខ្ជាយថវិកាជាតិ។

រឿងការបង្កើតខេត្តថ្មី ត្រូវចំណាយថវិការច្រើន។ ហើយទិដ្ឋភាព​បច្ចុប្បន្ន​នេះ ខ្ញុំគិតថាកាត់​បន្ថយការ​ចំណាយទៅអ្វីមិនចាំបាច់គឺជារឿងល្អបំផុតសម្រាប់កម្ពុជា ព្រោះយើងចង់ឃើញការយកថវិកាជាតិទៅពង្រឹងអ្វីដែលមានស្រាប់។ បើឃុំនិងស្រុករឹងមាំ គឺមានភាពសកម្ម មានធនធានគ្រប់គ្រាន់ មានមធ្យោបាយ​គ្រប់​គ្រាន់​[...]ការផ្តល់ សេវា នៅ មូលដ្ឋានលែងជាការបារម្ភ

នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ

បច្ចុប្បន្ននេះ កម្ពុជាមានរាជធានី/ខេត្តសរុបចំនួន​២៥ នៅទូទាំងប្រទេស​។ កាលពីចុងខែធ្នូ​ឆ្នាំ២០១៣កន្លងទៅ រដ្ឋាភិបាល​កម្ពុជាបានសម្រេច​​បង្កើតខេត្តត្បូងឃ្មុំដែល​ត្រូវបាន​បំបែក​ចេញ​ពី​ភូមិសាស្រ្ត​ខេត្ត​កំពង់​ចាម៕

CCIM/VOD

រក្សាសិទ្វិគ្រប់យ៉ាង។ គ្មានផ្នែកណាមួយនៃអត្ថបទនេះ អាចត្រូវបានផលិតឡើងវិញក្នុងការបោះពុម្ពផ្សាយ ការសរសេរឡើងវិញ ឬ ការចែកចាយឡើងវិញដោយគ្មានការអនុញ្ញាតជាលាយលក្ខណ៍អក្សរឡើយ។